Başkanın görevinä kandidat Sergey Çimpoeş “GRT” kanalın “Persona” programasının süresindä annattı, ani “Piligrim-Demo” kurumun başınnan Mihail Sirkeliylän lafetmedi o iş için, ani başkan seçimnerin çıkışlarınnan kayıl olmamaa.
Geçti afta ayırılmış başkan İrina Vlah, bulunarak cannı efirdä “GRT”-da, kabaatlı buldu “Piligrim –Demo” kurumun başını Mihail Sirkeliyi onda, ani o lafetmiş kandidatlarlan, ki onnar kayıl olmasınnar seçimnerin çıkışlarınnan. Mihail Sirkeli kendi tarafından söledi, ani bir da keret seçimnerdän sora buluşmadı ne Sergey Çimpoeşlan, ne da Dmitriy Manollan. Sirkelinin laflarını kaaviletti Sergey Çimpoeş, “Persona” programasında.
SERGEY ÇİMPOEŞ, başkan görevinä kandidat: “Bän işittim Vlahın laflarını o iş için, ani Mihail Sirkeli benimnän lafetmiş seçimnär için. Bitki keret Mihaillan biz buluştuk burada, sizin studiyanızda, taa Çiçek ayında. Bundan sora Mihailı görmedim hem lafetmedim onnan. Buna şaştım, neçin ki bişey Sirkeliylän lafetmedim. Bu İrina Vlahın tarafından aslı diil”.
Lääzım nışannamaa, ani başkan seçimnerin bitki çıkışlarını belli edecek Üsek Daava Palatası. Bakmayarak ona, ani taa bu daava kararı taa yok, inauguraţiya datası şansora belli edildi.
