Komrat regional sport liţeyın üürenicisi İvan Panainti serbest güreşindä halklararası turnirin çempionu oldu. Çempionat anılmış trenerin Saveliy Kioroglonun adına Tiraspoldä geçirildi. Ona katıldılar güreşçilär Moldovadan, Ukrainadan, Russiyadan hem Belarusiyadan.
İlk eri bu yarışmada İvan Postolaki kazandı. O söleer, ani ensemää zordu.
“Bän hazırdım bu yarışa serbest güreştä. Benim trenerlerim beni ii hazırladı”. – dedi güreşçi.
Ama İvan Postolaki kendi enseyişini taa bir adım gibi gelän başarılara karşı sayȇr.
“Bän koydum neetimä kazanmaa ilk erleri Evropa hem Dünnä çempionatlarında. Ozaman gurur duyacam”. – paylaştı çempion.
Trener Födor Tukan söleer, ani onun üürenicileri, angıları bu turnirä katıldılar, başarlarınnan sevindirdilär onu.
“Turnirdä vardı çok kaavi güreşçi. Biz kazandık çok ödül. Sanȇrım, ani bu çıkışlar pek ii”. – nışannadı trener.
Turnirin 2 –ci erlerini kendi kategoriyalarında kazandılar hep sport liţeyin terbiedilenneri:
Stepan Murzakov
Yüriy Panainti
Andrey Hadji
Sergey Kılçik
3 -cü erlerin kazanannarı:
Maksim Mihaylov
Vitaliy Dragnev
Grigoriy Malenkov
Bölä turnirlerin çıkışlarına görä her yılın ayırılȇr sportsmennär, angıları temsil ederlär Moldovayı Evropa hem dünnä çempionatlarında, söledi Födor Tukan.
“Geçmiş yıl çocuklarımız Nikolay Grahmez hem Pötr Karaseni Evropa ödüllerini kazandılar. Her yıl 2-3 sportçumuz Moldovanın toplu komandasına ayırılȇr deyni devleti dünnä uurunda temsil etmää” – dedi Födor Tukan.
Bu vakıt güreşçilär hazırlanȇrlar sıradakı yarışmalara. Hergün onnar zalda 3,5-4 saat geçirerlär.
