Bu afta sonu, canavar ayın 26-dan 27 – nä gecä, Moldova geçecek kış vakıdına. Saatları lääzım olacȇk çevirmää bir saat geri.

Dünnedä 192 devlettän 80-ni  diiştirer sezon vakıdını.

Lääzım nışannamaa, ani Moldovanın prezidenti İgor Dodon kış vakıdına geçmesi için soruşu cümneyä dartışmaklara çıkardı. Bunu için devletin başı yazdı Facebook-ta kendi sayfasinda. İgir Dodon yazdı, ani “Moldovanın en önemli ekonomika uurunda partnör devletleri saatların geçirilmesindän ya brakıldılar, ya brakılmaa neetlenerlär”.

Bu yılın baba marta ayında Evropa parlamenti aldı kararı 2021 yıldan beri kış vakıdına geçmektän brakılmaa.

2011 yılda kiş vakıdına geçmää vazgeçti Russiya hem Belarus respublikası, 2012 yılda – Armeniya. 2016 yılda bunu yaptı Türkiye.

Taa ilerdän – 2005 yılda kış vakıdına geçmää vazgeçtilär Gruziya hem Kazahstan. Orta Aziyanın 4 devleti da bunu yaptılar taa 90-cı yilların başında.