Kasım ayın 29-da «Gagauz-Art» cümnä topluluun resimcileri pay alaceklar sergidä, angısı Pridnestroviyanın (Transnistriyanın) Benderı kasabasında geçecek. Bunu için annattı topluluun başı, resimci Pötr Fazlı “Gagauziya Gün Gündan” programasında GRT kanalında.
Sergi açılacek bir dostluk cuvabı olarak Transnistriyanın yaşayannarına. 1,5 afta geeri o regionun resimcileri pay aldılar Gagauziyada geçän Kasım sergisindä.
«Bizim var hazırlıımız. Resimneri büün orayı götüreriz. Bu iş bir gözäl cuvap gibi olacek. Sergi açılacek Benderı kasabasının resim galereyasında. Bizä deyni bu gözäl bir kolaylık ilerletmää hem taa sıkı yapmaa bu baalantıları», — açıkladı «Gagauz-Art» cümnä toplulumun başı Pötr Fazlı.
İncäzanaatın sınırları yok. Bakmayarak ona, ani büünkü gündä Transnistriyanın statusun soruşu açık kalȇr, bölä olaylar vererlär 2 regionun yaşayannarına taa yakın olamaa biri-birlerinä.
«İncäzanaatın sınırları yok . Bu bizim kulturamız, kendiliimiz. Bu sergi taa yakınnaştıracek bizi hem incazanaat kilimimiz taa genişlenecek», — dedi Pötr Fazlı.
«Gagauz-Art» cümnä topluluun 12 resimcisi 63 yaratma bu sergiyä götüreceklär. Sergi kasım ayın 29-da açılacek.
