VI-cü Halklararası rus literaturasının festivali «Puşkinskaya gorka« festivali kapandı. Oluş geçti regional resim galereyasında Komratta. Yaradıcı insannar şannı peetçilerin şiirlerini hem proza yaratmalarını okudular.
«Ko kapansın karannık» muzıka-peet avşamında vardı nicä seslemää şannı şairlerin yaratmalarını. Festivali kurdu hem geçirdi Rusiyanın bilim hem kultura merkezı.
«Biz bu yıl seftä getirdik Gagauziyaya «Puşkinskaya gorka» Halklararası festivalini. O 6-cı sıra geçiriler. Taa ileri vardır Pridnestroviyaya giitiydik ama hiç düşünmedik, ani Moldovadan çıkmadıynan, var nicä taa başka yaşamak erlerindä festivali geçirmää. Bu tek festival Respublikamızda, angısı rus dilindä geçiriler», — nışannadı Оlesä Rudägina, Moldova rus yazıcıların Asoţiaţiyasının başı.
Festivalin kapanış günündä bir günnük resim sergisi da geçti.
«Oluşta resimcilär dä, şairlär dä, okuyucular da. Bu oluşta biz açıklȇȇrız genç yazıcıları. Şaşȇrım gençlerä, angıları enez duuȇrlar, onnar becerikli rus sözünü kullanȇrlar», — paylaştı Svetlana Vasilenko, Moskvanın rus yazıcıların birliin Bakannıın sekretari.
Аleksandr Puşkin – rus klassikacı, angısının yaratmalarında terbiedildi diil bir evlatboyu.
«Puşkin bizä deyni büün dä örnek. Bana kalsa, yıllar geçtikçä dä o bizim taa büük üüredicimiz olacȇk — incäzanaatta, sözdä, insanın saymasında, karılara davranışta, anaya, kendi uşaklarına. Puşkin bir zaman bıktırmayacȇk», — nışannadı Valentina Polikanina, şair, çevirici, publiţist Minsk kasabasından, Belarus.
Moldovada festivali tutturȇr üüretim hem kultura Ministerlii, Gagauziya kultura bakannıı, Moldova rus topluluu, Kişinövda bulunan Bilarus kultura merkezi, Puşkinin muzey – evi.
