GIZ Halklararası agentstvosunun ȇkspertları Komratta treningi geçirdilär. Oluş hazırlandı investiţiyaların hem ȇksport malların agentstvosunnan.
İnvestorlarlan hem halklararası partnörlarlan taa faydalı çalışmak olsun deyni Bakannık komiteti bu yıl eni bölümü açtı — investiţiyaların hem ȇksport malların agentstvosunu.
«Bu ilk bilgilär, angılarını biz giriştireriz bizim avtonomiyamızda. Sanȇrım, ani bu agenstvo verecek kolaylıı taa aktiv işleyelim. Bunun için bizim partnörlarımız GİZ kurumundan bulundular yanımızda, da şindi biz hazırız paylaşmaa informaţiyaylan. Ekspert tanıştıracek bizi, nicä lääzım işlesin investiţiyaları çekmäk agenstvosu hem Bakannık komiteti, ki ekonomika ilerlesin. En paalı yaşamakta — informaţiya», — söledi tereningin açılışına katılan Gagauziyanın başkanı İrina Vlah.
Ekonomika konsultantı Bjoen Vogler annattı, ne o investiţiya agenststvosu hem nesoy yardım onnar vererlär investorlara.
«Siz lääzım annayasınız, ani investorlar aarȇrlar er, neredä ilerletmää kendi biznesini. Onun için lääzım verelim onnara teklif. Ama ilktän önemli annamaa, ne onnar aarȇrlar, açan işteerlär investiţiya yapmaa. Taa sık investorlar çekederlär regionun gözletmesindän», — dedi ekspert.
İnvestorlar, angıları hazır ilerletmää ekonomika baalantılarını, lääzım bilsinär neyä investiţiya yapmaa. Bu etapta önemli göstermää devleti, nekadar taa ii taraftan, nışannadı ekonomika konsultantı.
«Bizim needimiz- kurmaa Moldovada iş erlerini. Ki bunu yapmaa lääzım bulmaa investiţiyaları aşırıdan. Ki ekonomika agentleri gelsinär devletä da açsınnar eni iş erlerini», — söledi proekt-menedjer Tomas Ferç.
GİZ agenstvosunun ii bir proekti — giriştirmää proektları , angılarına katılȇr investorlar, ekledi Tomas Ferç.
«Bän sevinerim ona nekadar bu region açık. Onnar görerlär faydayı barabar ekonomika baalantılardan. Biz hazırız ileri dä işleyelim barabar da yardım edelim Gagauziyanın investiţiyaların çekmäk agenstvosuna ki ilerlensin».
2015-ci yıldan GİZ agenstvosu başarlı işleer Moldova devletindä. Onun yardımınnan respublikada açıldı 15 bindän zeedä iş eri.
