Büünkü gündä Gagauziyada işler türlü soţial programmalar, angıları gün – gündän taa üüsek uura kalkȇrlar. Bu üzerä 2020 yılda büüyeceklär ödemeklär suuk vakıdı için hem uşaan duuması için.
2020 yılda suuk vakıdı için kompensaţiyalar 100 leydän 125 leyadan zeedelenecek. Butakım, 5 ay için kompensaţiya olacek diil 500 ley, nicä ilerdän, ama kuracek 625 ley.
Deyni ayleleri tutturmaa uşaklar duuduynan, hem taa da çok uşak duusun Gagauziyada, bu uurda da ödemeklär büüdülär. 2017 ylda ilk uşaan duuması için ödenärdi 400 ley, ikinci uşak için – 600 ley. 2018 yılda ilk uşak için — 1000 ley, ikinci uşak için da 1500 ley verilärdi, haberledi saalıı korumak bakannıın başın yardımcısı Alöna Kozar.
«Devlet büdjetindän kaarä para yardımını analar kablederlär avtonomiyanın büdjetindän dä. Bu yıl ilk uşaan duuması için veriler 2500 ley, 2-ci hem taa çok uşakların duuması için da 4000 ley. Bu ödemekleri üüselttilär 2020 yılda. Butakım, ilk uşak için ödenecek -4500 ley, ikinci hem taa çok uşakların duuması için 6000 ley», — açıkladı Alöna Kozar.
Bundan kaarä, aylelerdä, angılarında ikizlär duȇr, ödeniler 20 000 ley. Aylelerä, angılarında 3 uşak birdän duȇr – 50 bin ley.
