«GRT» Cümnä Kompaniyası Eni Yıl gecesindä kendi siiredicilerini yortulu programaylan sevindirecek. Bu yıl televizion siiredicilerini eniliklär bekleer.
Eni Yıl gecesindä «GRT»-ın siiredicileri televideniyanın yayınında yortulu programayı göräbileceklär, neredä Gagauziyanın türkücüleri eni türkülerini çalaceklar, oyuncular da yaradıcılık nomerlarını göstereceklär.
Çekimnerä kompaniyanın çalışannarı bir ay hazırlandılar. Programanın yazmak sırasına katıldı kompaniyanın yaradıcılık hem tehnika izmeti.
«Dekabrinin 31-dä «GRT» -nın siiredicilerini eni yıl sürprizleri bekleer. Sizä deyni biz “Eni Yıl GRT-da” programasını hazırlȇȇrız. Sade Eni Yıl gecesindä bizim siiredicileri bekleer türkülär, oyunnar hem şakalar. Çünkü Eni Yıl – ölä yortu, açan insan şakalaşmaa, sevinmää, şampanyayı isteer içmää», — söledi tv bölümün baş redaktoru Valentina Koroläk.
«Gagauziya Radio Televizionu» kompaniyasının siiredicilerini Moldovanın hem Gagauziyanın artistleri kutlayacek.
Eni Yıl gecesindä «GRT»-ın siiredicileri göräbileceklär yortulu programayı hem avtonomiyanın hem Moldovanın öndercilerin kutlamaklarını.
