Komrat kasabasının primariyası ödülledi 50 yıldan zeedä barabar yaşayan çiftleri. Kutlamaa onnarı geldilär hısımnarı da. “Altın düününü” kutlayan çiftlär paylaştılar, nedä saklı onnarın barabar uzun yaşamasının kısmeti.
3-cu yıl sıravardı Komrat kasabasında ödüllerlär o ayleleri, angırarı yarım asirdän zeedä birliktä yaşȇȇrlar. Bu sıra yortuya teklif edildilär 14 çift. Onnarın arasında buluner Dmitriy Gradinar da — Gagauziyanın anılmış üüredicisi. Bu yıl bu aylä nışannȇȇr “altın düününü”.
«Saklılık yok — annaşmak biri – birimizä, yardım etmäk, biri-birimizi koorumak. Hepsi zorlukları birerdä geçireriz», — paylaştı Dmitriy Gradinar.
Zoorluklara bakmadaan, karı – kocalar koruyabildilär biri-birinä sevgiyi hem saygıyı. Onar sayȇrlar, ani evlilik zoor bir iş.
«Bu uzun yolu geçmää deyni, lääzımdı olalım taa yakın biri-birimizä. Hem sevinmeliikleri, hem kahırları payedelim biri-birimizlän», — söledi Georgiy Mihaylov.
«Ayledä önemli seslemää biri-biribi, işitmää biri-birini, yardım etmää biri-birinä», — sayȇr Elizaveta Popazoglo.
«İstemäk aylemizi korumaa hem uşaklarımızı büütmää», — söledi İvan Popazoglo.
Komradın öndercilii baaşladı übilärlara gramotaları hem baaşışları.
«Bu iş diil kolay — biz bunu bileriz. Olmalı, olmayaydılar zoorluklar, sizin ayleleriniz bukadar uzun bir ömür birliktä yaşayamayacȇydılar. Uşaklar birleştirerlär ayleleri. Karı-kocadan yakın bu dünnedä biri yok», — dedi Komrat kasabasının primarı Sergey Anastasov.
O ayleleri, angıları bu şannı olaya gelämedilär, kutladılar onnarı evlerindä.
«İsteerim sölemää, ani herbir aylä seviner, ani onnarı unutmadılar. Bu aylelär yıllar buyunca birliktä yaşadılar, biri-birilerini sevdilär, biri-birlerinä dayandılar», — nışannadı Olga Patutina, primariyanın cümne bölümün uzmanı.
Yortuyu hazırladılar hem geçirdilär Komradın primariyası hem ZAGS kurumun uzmannarı.
