Türkiya prezidentin Recep Tayyıp Ȇrdoanın teklifinä görä Moldovadan delegaţiya prezidentlan İgor Dodonnan başında bulunȇr ofiţial vizitinnän Türkiyedä.
Bunu için haberleneer devletin başın facebook sayfasında.
Delegaţiyaya girdilär: başbakan İon Kiku, parlament başın yardımcısı Vlad Batrınça, Gagauziyanın başkanı İrina Vlah, bakannar hem başka devlet görevlileri.
Viziytin planında var buluşmaklar Türkiya prezidentinnän Recep Tayyıp Ȇrdoannan, parlamentin başınnan Mustafa Şentoplan hem 2 devletin bakannarın buluşmakları.
Vizitin sırasında İgor Dodon götürecek 2 devletin arasında en üüsek uurda kurulu strategiyalı ilişkilerin sovetin ilk oturuşunu. Ondan sora yazdırılacek birkaç annaşmak, baalı araba kullanıcıların kimliin 2 taraflı tanılmasınnan, halklararası aar üklerin taşımacılıınnan, bilim, tehnologiyalar hem başka bölümnerdä barabar işlemelerin ilerlitmesinnän hem başka, sölener Dodonun haberindä.
“Türkiya – bizim strategiyalı partnörumuz. Ofiţial viziti verer bizä kolaylıı ilerledelim 2 taraflı ilişkilerimizi, angıları faydalı olȇr 2 devletä dä”, — nışannadı İgor Dodon.
Türkiya prezidentin Recep Tayyıp Ȇrdoanın ilk viziti Moldovaya gerçeklendiydi 2018 yıl da oktäbrinin 17-18 –dä. 2 günün içindä imzalandıydı sözleşmäk 2 devletin strategiyalı ilişkilär için, kurulduydu strategiya ilişkişlerin soveti, açıldışlar Türkiya devletin yardımınnan tertiplenmiş prezident binası, Gagauziyada temeldän düzülmüş birkaç soţial uurunda obyekt, annaşıldıydı 2 taraflı çalışmaların bölünerin sayısını zeedeletmää.
