Orak (iül) ayında Halk Topluşu Moldova Respublikasının Parlamentinä seçilmiş iki deputatın görevini bitirilmiş tanıdılar. Butakım Komradın bir seçim dolayı hem Kazayak küüyü Halk Topluşunda deputatsız kaldılar. Şindi Gagauziya kanonnarı yaradan organını temsil ederlär 33 deputat.
Avtonomiyanın Merkez Seçim Komisiyası (MSK) danıştı Gagauziya Halk Topluşuna (GHT) deyni deputatlar belli etsinnär seçim gününü iki seçim bölümändä – Kazayakta hem Komradın dördüncü seçim bölümündä. Bu danışmayı bakȇr maasuz komisiyä, haberledi GHT başı Vladimir Kısa. O sayer, ani bu iki bölümün deputatı lääzım seçilsin erli önderci organnarın (primarların hem Sovetlerin) seçimnerindän sora.
VLADİMİR KISA, GHT başı: “Beki deputatlardan var kim isteyecek pay almaa erli kuvetlerin seçimnerdä. Onnarın buna hakları var. Onuştan düşünerim, ani lääzım olacek taa çok deputat seçilsin. Dooru olacek dooru, eer bu soruş hepsi kolegalarlan barabar bakılacek”.
Halk Topluşu şindiki çaarışın mandatı bitecek gelecek yıla.
