Geçan dinnenmäk günnerindä taa bir Gagauziyanın futbol çempionatın turu geçti. Ondan sora turnir tabliţası diişti.

Pazar günündä 14-cu tur Gagauziyanın futbol çempionatı oldu. Valkaneş kasabasından komandası kendi evindä Komratlı «Umutluk» komandasını 2:1 sayiylan taradı. Kıpçaklı «Sokol» Çadır komandasını 3:1 sayiylan taradı. Pek bir meraklı matç Tomay hem Beşalma komandaların arasında oldu. Musaafirlerdä oynarkan, Beşalmalı komandası zoorlan taradı Tomay küündän komandası 2:1 sayiylan.

Komrat kasabasından «Olimp» komandası genä taradı. Bu kerä,onnar Karboliyaylan oynadılar, da 6:2 sayilan taradılar. Kongazçiktan komandası ilk punkt turnir tabliţasında kazandı. Onnar Avdarmıylan 2:2 sayiylan oynadılar. Kongazçiktän bir futbolcunun laflarına görä, kimär kerä, komandada kolaylıı vardı taramaa.

«Çempionatın çeketmesindä biz diil ölä islää oynardık, ama şindi biz biraz toplandık. Bir maçta bizä biraz etişmedi Kıpçak komandasını taramaa, angısı ikinci erdä bulunȇr. Bizim son maçimızda bizdä vardı kolaylık taa ii oyamaa. Ama bitkidä, biz oynadık, nica oynadık.», — haberledi futbolcu.

Gagauziya futbol çepionatın çikışlarına görä Olimp komandası ilk erdä kalȇr. Ondan sora gider Sokol. Tabliţanın sonunda ölä da kalȇr Kongazçik, angısında sade bir punkt var.

Avtor: Sergey Roşka