Ceviz ayın 11-dä Çadır kasabasının stadionunda geçti halklararası futbol dostluk matçı Gagauziya hem Antalia kasabasının futbol veterannarın arasında.

Oyun geçti pek meraklı. Bakmayarak, ani matç yapıldı afta içindä, stadionda toplandı 600 –zä yakın insan. Onnar büük havezlän baktılar oyunu. Komandaların ikisindä dä oynadılar anılmış futbolistlär.

Gagauz toplu komandasının adına oyunadı Sergey Epuränu – ilerdän milli komandasının oyuncusuydu, Vlad Kopoţ — «Bucak» hem «Nistru» klubların koruyucusu, boba Serafim Muntänu – Moldova çempionatı oyunnnarın payalanı, boba Dmitriy Markov — «Saxan» klubun eski oyuncusu hem tokatçiların trenerı hem başkaları. Komandanın kapitanıydı İvan Tabanov — milli toplu komandasının eski oyuncusu, haberleneler SAXAN klubun sayfasında soţial media saytında.

Musaafirlerin komandasına girdilär halklararası uurunda tanılan futbolcular.Onnar oynadılar Türkiyenin çempionatlarında hem Germaniyanın Bundesligasında. Türküye komandasının koruyucusu Selim Özer oynadı 150 –dän zeedä matç «Bursaspor» hem «Trabzonsor» klubların adına hem Türkiye milli komandasında. Onun kollegası Ȇrhan Albayrak oynadıydı Bremen kasabasının «Verder» komandasının adına hem Türkiyenin «Fenerbahçe», «Koniaspor» hem «Gaziantepspor»  klubların adına, 1997 yılda da Türkiye kuboonu taradı. Djem Karadja çok yıl Germaniyanın «Kayzerslautern» hem «Sankt-Pauli» klubların adına oynadı, sora da «Fenrbahçe», «Koniaspor», «Sivaspor» komandalarında oynadı.

Futbolcüların çoyu, angıları pay aldılar oyunda, şindiki zamanda trener işini yapȇrlar. Oyuncular üüsek uurda oyunu hem profesionallıını taa bir keret gösterdilär, birisi da aşaa kalmadı, bitirip oyunu sayıylan 3:3.

Gagauz komandasından iki gol urdu Egor Födorov, üçüncü golu urdu boba Serafim Muntänu. Türkiye devletin komandasından iki golu urdu oyuncuların kapitanı Selim Özer, taa bir topu urdu Zeki Yılmaz.