Bu yil kasım ayin 12-dä tamannanȇr 30 yil, nicä kuruldu Gagauz avtonom Sovet Soţialist respublikası Moldavia Sovet Soţialist respublikasının içindä. Bu üzerä Gagauziyanın bilim – araştırmak merkezindä geçti tombarlak masa.

Korumaa hem ilerletmää deyini gagauz halkın dilini, adetlerini hem  kulturasını ideya gagauzlarda peydalandıydı 1980-cı yilların bitkisindä. Çiçek ayin 21-dä 1989- cu yilda geçti gagauz halkın ilk  toplantısı, neredä kararlandıydı  kurmaa Gagauz avtonom Sovet Soţialist respublikasını Moldavia Sovet Soţialist respublikasının içindä. Hep o yıl  kasım ayin 12-dä geçti gagauz halkın  maasuz kurultayı, neredä kabledildi hem haberlendi Gagauz avtonom Sovet Soţialist respublikası için Moldavia Sovet Soţialist respublikasının içindä. Ama ertesi günü,  kasım ayin 13-dä, Moldavia Sovet Soţialist respublikasının üüsek sovetin prezidiumu geeri uurdu  gagauz halkın  maasuz kurultayın kararını, sayıp onu  konstituţiyaya karşı,  getirer aklına Gagauz Respublikasının  aktivistlerin biri Leonid Dobrov.

«O zamannar durum okadar  kötüydü, ani çok dartışmaklardan sora seslerin verilmelerindän sora hep okadar bildirildi Gagauz avtonom Sovet Soţialist respublikası için Moldavia Sovet Soţialist respublikasının içindä» , — getirer aklına Gagauz Respublikasının aktivistlerin taa biri İvan Burgudjı.

Gagauz halkının maasuz kurultayın kararını Moldavia Sovet Soţialist respublikasının üüsek sovetin prezidiumun geeri uurması gagauz halkının aktivistlerini durgutmadı.

1990-ci yilın harman ayin 19-da Komrat kasabasının “Drujba”  kinoteatrusunda  geçti  hepsi uurların  deputatların kurultayı, neredä bildirildi baamsız Gagauz Respublikasının kurulması, angısı ileridoru sürttü 4 yil.

1994 – cu yılın kırım ayın 23-dä sa, Gagauz Respublıkasının Üüsek sovetın temsilcilerin katılmalarınnan Moldova devletin Parlamenti kabletti Gagauziyanın genel kanonunu.

 

Tekst: P.Barbova, video: G.Stavilov, montaj: E.Melnik