Komrat kasabasının karıların cümnä toplumun merkezi avtonomiyanın baş kasabasında çalışȇr bir yılın süresindä. Bu vakıdın içindä türlü yardımnarı kablettilär yaşayannar diil sade Komrattan, ama Gagauziyanın başka yaşamak erlerindän da.
Zoya Sivakova geldi Komrat kasabasına Krımdan kendi kardaşına musafirlää. Etişip, karşı geldi onun zor yaşamak durumunnan, da kaldı burada. O üzerä, ani kardaşında yok lääzımnı koşullar, Zoya Sergeevna danıştı Komrat kasabasının karıların cümnä toplumun merkezinä.
«Bän geldim kardaşıma, da düştüm pek zor duruma. Kardaşım yatalak, kırdı ayaanı. Hepsi dostları, komuşuları döndülär ona arkasını, kaldım bu zorluklarlan yalnız. Bana nasaat ettilär danışmaa karıların cümnä toplumun merkezinä, nerdä var nasıl yıkanmaa, rubaları yıkama hem da dostlaşmaa. Da tä bölä bän düştüm burayı», — dedi Zoya Sivakova.
Komrat kasabasının yaşayanı Aleksandra Kameneţkaya, düşüp hep zor yaşamak durumuna, çeketti gelmää kuruma yardım için.
Komrat kasabasının karıların cümnä toplumun merkezin neeti yardım etmää o insannara, kimä en zor büünkü gündä, çizgiledi karıların cümnä toplumun merkezin başı Lidiya Sırbu.
İlk yardım merkezä geldi Gagauziyanın bakannık komitetindän, haberledi Lidiya Sırbu.
Komrat kasabasının karıların cümnä toplumun merkezi bulunȇr Tretyakova sokanda, 42 nomerdä. Yardım için burayı var nasıl danışsınnar pensionerlar, fukaarä insannar, çok uşaklı aylelär. Burada var nasıl yıkanmaa hem da yıkama rubaları.
