Pensiyalar, angıları yaşamak için lääzımnı uura etişmeerlär, 2020-ci yılda 2 sıra var nicä büüyüsünnär. Bu karar alındı Moldovanın Hükümetin oturuşunda.

Pensiyaları zeedeletmäk proekti verecek kolaylık fukaarä insannarın yaşamaklarını taa kolay hem kaliteli yapmaa, sayȇr ekspert Galina Şalar.  O annattı neçin lääzım yapılsın bu iş.

«Pensiyada bulunan yaşayannara pek zoor. Pensiyaların indeksatiyası pek önemli bir soruş. Moldovada var ölä insannar, angıların pensiyaları pek küçük hem öleleri, angıların pensiyaları pek büük. İndeksaţiya yapmaa lääzım, ama bu işleri lääzım esaba almaa.  Pensiyaları kaldırmaa läzım onnara, kimä bu iş haliz pek lääzım», — dedi Galina Şalar.

2020-ci yılın çiçek (aprel) ayından plannadılar kaldırmaa pensiyaları hepsinä. Canavar (oktäbr) ayından pensiyalar lääzım zeedelensinnär taa 400 bin kişiyä deyni.  

“Biz bu pensiyayı kazandık. Da o 3bin leya yakın olsa da… Ama neçin sa pensiyaları kaldırȇrlar onnara, kimdä o en küçük. İnsan beki işlämedi, gitti bireri, kazandı, da ona şindi kaldırȇrlar. O insan da, kim burada bütün yaaşamasını işledi, kaldırȇrlar yılda bir keret”, — dedi bir pensionerka. 

“Çok neya etmer pensiyam. Umutlanȇrız, ani taa kaldıracȇklar”, — paylaştı bir adam.

“Biz hiç diil memnunuz pensiyalarımızlan. Var nicä demää gülmää alȇrlar bizi bu pensiyalarlan. Bütün yaşamamızda işledik, ama bitkidä kalȇrız küçük pensiyaya”, — küsüylän dedi taa bir karı. 

Pensiyaların büüyültmesinin sayısı kurulacek imäk malların paaların yılda indekslerin orta ölçüsünü bitki 3 yılın içindä.

 

Tekst: T.Kazaku, video: Ü.Glekov, montaj: M.Kazaku