Gagauziya bugün kutlȇȇr kendi kurulmasının 25-cı yıldönümünü. Bu gün 1994 yılda Moldovanın parlamenti kabletti Gagauz erinin avtonomiyası statusu için kanonunu. Nikolay Telpiz bu kanonu hazırlayan komisiyanın başının yardımcısıydı. O açıkladı bu kanonun angı statyaları büünnän büün esaba alınmȇelar devletin kuvetlerinnän.
MD Parlament komissiyanın başın yardımcısı Nikolay Telpiz, angısı işlettirdı Gagauziyanın baş kanonunu, annattı ne üzerä çalışmȇr Kanon büünkü günnär.
“25 yıl gösterdi, ani neya biz ozaman kayıl olduk, çok vakıt biz zeetlendik bu görüşmelerdä, bu kanonu yazdık kendi ellerimizlän, biz onu fikirimizdän geçirdik, koyduk onu bir uura halklararası kanonnarınnan, ani bizä maana bulmasınnar ani biz naşeysa isteriz. Biz sadä istärdik bizi saysınar halk olarak, bizdä vardı dooruluumuz deyni biz kullanalım yaşamamızı nicä halkımız isteer. Onuştan bu kanonu savaştık getirmää o uura, deyni bu kanon olsun bizä garant, ani halk yaşasın kendi fikirlerinä görä”, — nışannadı Nikolay Telpiz.
Problemalar Gagauziyanın baş kanonu işlettirmesindä taa onda, ani kimi statyalarda yannışlıklar vardılar, sayȇr Parlament komissiyanın başın yardımcısı Nikoly Telpiz.
Annaşmak proţesi kanondakı bazanın hazırlanması için çeketti taa 1989 yılda, nışannadı Nikoly Telpiz.
Gagauziyanın baş Kanonu kabledildı 1994-cu yılın dekabrinin 23-dä. Bu yıl tamannanȇr 25 yıl nicä kuruldu Gagauz avtonomiyası.
