Genel prokuraturanın temsilcileri bildirdilär, ani onnarın elindä bulunan Kroll-2 otçodun versiyasında “milliardı çalmaktan faydalanmış kişilerin listesi” gibi ek olarak bir da dokument yok.
Onnarın haberinä görä, genel prokuror Aleksandr Stoyanoglo dooruttu banklardan çalınmış milliardı aaraştırmış parlamentin komissiyasının eski başına Aleksandr Slusarä ofiţial danışmayı, angısında o ister Slusar temsil etsin “milliardı çalmaan kabledennerin listesini”, haberleer tv8.
Genel prokuraturuda derlär, ani Kroll-2 otçodu hem ona ek dokumentleri, angıları yapıldıydı Milli bankasının istemesinä görä, korrupţiyaya karşı çalışan prokuratura kabletmışmış 2018 yılın madın 22-dä.
“Kriminal yaptıkları aaraştıran bölümün gruppası kontroldan geçirer bilgileri, angılar kabledildi proţess proţeduraların sırasıda da bakılı cezalamak koeksindä. Moldovanın prokuraturası haberleyecek cümneyi aaraştırmaların çıkışları için. Bundan kaarä, ona görä, ani otçodu hazırladı Moldovanın milli bankası, korrupţiyaya karşı işleyan prokuratura istedi onun temsilcileri kanona görä kontrol etsinnär otçotta bulunan bilgileri da sora temsil etsinnär onnarı prokuraturaya”, — haberleer kaynak dayanarak kurumun pressa relizinä.
Nışannayalım, ani milliardin çalmasını Moldovannın 3 banktan lafettilär yanvarin 7-dä devletin genel prokuroru Aleksandr Stoyanoglo hem milliardin çalmasını aaraştırmış parlament komissiyasının eski başı Aleksandr Slusar. Buluşmaa istediydi genprokuror.
