Valkaneşli gagauz türkücüsü Pelageya Stefoglo genä katılacek Eurovosion milli ayırmak turuna, deyni temsil etmää Moldovayı Eurovosion 2020 yarışmasında. Bunu için o hazırladı eni türküyü ingliz dilindä Empathy.
Türkücüyä ayırmak turuna düşmää diil kolay oldu. Pelageyanın ayırmak turuna katılması için danışması organizatorlara belirsiz sebeplerin beterinä zamanında gelmedi. Bunu için o üürendi, açan yarışıcıların listesi artık kabledildiydi, yazdı facebok sayfasında Pelageya.
“Bizi bu haber şoka uurattı, dostlar, neçin ani biz okdar hazırlandık, okadar gözäl türküyü yarattık! Da tä, bitki-bitkiyä, bu durumu çözäbildik da bizi aldılar ayırmak turuna. Bunu için çok saa olsunnar Moldovanın Eurovision yarışmasının organizatorları”, — haberledi türkücü.
Pelageya Stefoglo danıştı onun yaradıcılıını sevennerinä tuttursunnar onu ayırmak turunda.
“Sizdän tutturmanızı bekleeriz, dostlar, çünkü sade barabarkana biz KUVETiz!”, — yazdı o.
Pelageya Stefoglo geçan yıl da katıldı Eurovosion milli ayırmak turuna. Bu yıl seslemeklerä ayırıldı 36 türkücü. Onnarı cannı seslemeklär geçeceklär fevralin birindä saat 15:00 Milli televideniyasının 2-ci studiyasında hem Moldova 2 kanalın cannı yayınında.
Eurovosion 2020 sa geçecek Niderlandı devletindä mayın 12-dän 16-nadan.
