Büün, yanvarin 30-da, Komratta geçti dış donorlar koordinaţiya sovetin oturuşu. Onda pay aldılar Moldovada işleyan elçiliklerin başları. Onnardan birkaçınnan, oturuş başlamadaan, buluştu Gagauziyanın başkanı İrina Vlah.
Komratta Türkiye konsolluun açılışına gelecek Türkiyenin dış işleri bakanı
Moldovada Türkiyenin elçisinnän Gürol Sekmensüyerlän buluşmanın sırasında başkan haberledi elçiyi, nicä geçti gagauz delegaţiyasının iş viziti Türkiyeya geçän günnerdä.
Başkan nışannadı,ani Sakarya bölgesindä yapılmış buluşmaklar baalıydılar ekonomika uurunda soruşlarınnan hem para yatırmalarınnan.
Hep ölä, lafedildi Komratta düzülän stadionun düzmäk işlerin adımnarı için.
Geniştän bakıldı Komratta düzülecek industrial kollecin düzülmesinnän baalı soruşlar. İrina Vlah inandırdı elçiyi, ani düzmäk işlerin sırasında tehnik uurunda hepsi soruşlar olacek Bakannık Komitetin, primariyanın hem başka profil kurumnarın maasuz kontrolün altında.
Hep ölä buluşmakta bakıldı soruşlar, baalı Türkiyenin dış işlerin bakanın Mevlät Çavuşoglunun gelmesinnän Gagauz Erinä, angısı katılacek Komratta Türkiye konsolluun şannı açılışına.
Latviyanın elçisi açıkladı hazırlıını finanslamaa kimi proektleri Gagauziyada
Moldovada Latviya devletin elçisinnän Uldis Mikutslan başkan baktı eni sferalarda işbirlii kurmasının kolaylıklarını. Gagauziya şindiya kadar çalıştı Latviyanın Kurzemsk bölgesinnän.
Latviyanın elçisi açıkladı hazırlıını finanslamaa kimi proektleri Gagauziyada başka devletlärlän hem fondlarlan bir uurda.
