Kongazçik küüyünün uşak başçasında çok zaamet ederlär deyni uşaklar gagauzça bilsinnär. Gagauziya başkanı İrina Vlah barabar küüyün primarınnan uuradılar bu terbiyetmäk kurumuna gagauz dili dersinä.
Kongazçik küüyünün “Zoloyoy klüçik” uşak başçasında terbiyediler yakın 90 uşak. Üürenmäk kurumunda üürenerlär gagauz hem moldovan dillerini bilingval programasına görä. Üüredicilerin laflarına görä, gagauz dilini uşaklara zor üürenmää, çünkü evdä onnar konuşmȇȇrlar ana dilindä.
“Derslär geçerlär pek meraklı, ama bir problemamız var, ani evdä analar – bobalar uşaklarlan gagauzça lafetmeerlär. Onuştan biz onnarı yalvarȇrız, ani taa çok lafetsinnär gagauzça. Hrbir derstän sora biz yollȇrız Viberdä onnara mesajları ki evdä kursunnar dialogları ne görerlär evdä onu da lafetsinnär temaya görä”, — annattı Kongazçik uşak başçasında gagauz dili üüredicisi Evdokiya Komur.
Derslerin birindä bulundu Gagauziya Başkanı İrina Vlah.
“İki yıl bu programa işler. Çok işlär diişti bu uurda, ama bän sanȇrım ani ta çok lääzım çalışmaa hepsinä: hem üüredicilerä, hem da analara – bobalara. Biz herzaman söleriz ani uşaklarımız lääzım lafetsinnär ana dilindä, herzaman söleriz ani uşaklarımız lääzım bilsinnär devlet dilini. Ama biz diil sade söleriz bunnarı, ama kurȇrız ölä koşulları ki her bir okulda uşak bişey üürensin. Bu yol zor, neçin ani çok yıl bişey yapılmadı. Bu bitki iki yıl geçti, da tä biz geldik, bän bakȇrım ne oldu, ne diişildi, ne lääzım taa yapmaa. Saa olsunnar üüredicilerimiz, onnar çalışȇrlar pek islää. Ama isterim söleyim analara – boblara da, kim uşaklarını okula hem uşak başçasına getirer, annasınnar, ne iş için biz bu programayı yapȇrız”, — açıkladı başkan.
Gagauziyada şindän sora üçüncü yıl giriştiriler multilingval üürenmesi. O dorudulu ona, ani uşaklar taa küçüktän bilsinnär ana dilini hem hep ölä devlet dilini. Çünkü nekadar taa erken uşak üürenecek dili, taa ii onu bilecek. İkinci etapa görä uşaklar dili okulda üürenerlär.
Avtor: M. Statova, Z. Kanţır, video: G. Stavilov, montaj: A. Topal
